O Concello de Padrón distinguirá a José Antonio de la Riera Autrán co premio Padrón, Berce do Xacobeo, un galardón que implica o seu nomeamento como Peregrino de Honra e que o acredita como embaixador padronés e do Camiño.

O acto, que se enmarca na celebración do Día do Peregrino, desenvolverase o venres 21 de xullo, a partir das 12.00 horas, na igrexa parroquial de Santiago de Padrón.

Nado en Vigo en 1953, José Antonio de la Riera Autrán é fundador da Asociación Galega de Amigos do Camiño de Santiago (AGACS), entidade que foi recoñecida co Premio Elías Valiña 2004 á recuperación dos Camiños de Santiago, un premio que conceden a Xunta e o Comité Internacional de Expertos do Camiño. Ademais é fundador da FICS e actual vocal de comunicación da Fraternidad Internacional del Camino de Santiago, que acolle a peregrinos de 29 países.

Con esta distinción, o Concello de Padrón pon en valor tamén a experiencia como peregrino e hospitaleiro de José Antonio de la Riera, unha das persoas máis implicadas no estudo, na conservación, na defensa e na promoción do Camiño.

O premio Padrón, Berce do Xacobeo foi instaurado no ano 2017 polo Concello padronés para destacar o traballo realizado por persoeiros relevantes a prol do Camiño, co obxectivo de que exerzan ademais como embaixadores de Padrón nas rutas xacobeas. O premio tamén tributa un recoñecemento simbólico aos peregrinos que diariamente transitan pola vila así como para insistir na relevancia de Padrón na propia tradición xacobea.

Persoeiros tan recoñecidos como o periodista radiofónico Pepe Domingo Castaño (2017) ou o estudoso do Camiño de Santiago Manuel Garrido Rivero (2018) preceden esta sexta edición.